DSTV-AfricaMagic Swahili ‘yamlilia’ Kanumba

AFRICAMagic Swahili imetangaza kumuenzi aliyekuwa mcheza filamu nyota nchini marehemu 
Steven Kanumba aliyefariki dunia mwishoni mwa wiki iliyopita na kuzikwa juzi katika makaburi ya Kinondoni Da r es Salaam. 

Kwa mujibu wa taarifa iliyotumwa kwa vyombo vya habari na Ofisa Habari wa Multichoice Tanzania Barbara Kambogi kifo cha Kanumba kimeshtusha mashabiki wa filamu Afrika Mashariki. 

Taarifa hiyo ilisema, kama sehemu ya kumuenzi Kanumba, chanel hiyo maalumu kwa ajili ya filamu za Kiswahili itaonesha baadhi ya filamu zake kwa mwezi mzima huu ambapo kwa kuanzia Jumamosi hii ya Aprili 14 saa moja na nusu jioni itaonesha filamu ya UNCLE JJ, ikifuatiwa na THIS IS IT (part 1 na 2) Jumapili. 

Jumamosi ya Aprili 21 saa moja na nusu itaonesha filamu ya MORE THAN PAIN na siku inayofuata itaonesha YOUNG BILLIONAIRE (part 1 na 2). 

Baada ya hapo, Channel hiyo itaonesha filamu ya BLACK SUNDAY, Jumamosi ya Aprili ya 28 saa tatu na dakika 20 usiku ikiwa ni sehemu ya kuonesha uwezo, na kipaji cha marehemu Kanumba. 

Kwa upande wake Mkurugenzi wa M-Net Africa Biola Alabi alisema: “Tunapaswa kumsherehekea kijana huyu ambaye alifanikiwa kuzikonga nyoyo za wengi, kufa kwake ni 
kupotea kwa burudani katika soko la Afrika na tunapenda kutoa pole zetu kwa familia yake, rafiki zake na wote waliompenda”. 

Kanumba alifariki baada ya mzozo na anayedaiwa mpenzi wake Elizabeth Michael, ‘Lulu’ ambaye pia ni msanii wa filamu ambapo alimsukuma na kuangukia kisogo kitu kinachodaiwa 
kuwa chanzo cha mauti yake, Lulu bado anashikiliwa na Polisi na jana alipandishwa kizimbani 
kujibu shitaka hilo.